الاثنين، فبراير 13، 2012

منزلتش الميدان


أنا منزلتش الميدان و لا هتفت مع الشجعان

ولا قابلتش صدفة رصاصة ولا فقدت بخرطوش عين

أنا راشيء أهو عالكنبة .. و بتقلب على الجنبين

ساعة بتابع الأخبار .. و ساعتين بفتي ليه نازلين

و ساعة بناجي في الأقدار و بتسائل لفين رايحين

قلنا يا دوبها دي مظاهرة .. و عيال طايشة مش قادره

و قولنا يادوب يكون بكره و ينفضوا في غمضة عين

و فات بكره و جه بعده .. و كم فجر أهم عدوا

ولاد عمري بيتحصدوا و لسه برده مش حاسين؟!

يا ولد أدن في البلاد .. قول الثورة طالبه المدد

طوف البلاد .. نادي العباد قول الطغاة فاقوا العدد

يا تقوموا قومة .. يا تضلوا كومة .. شوية عمالة على حثالة على غنم

تتهسوا هس و تندثوا دث في طاجن العسكر المحترم

ولادي ماتوا و بكره غيرهم و أنتم وراهم و مش آخرهم

الغولة غادرة .. عالكره قادرة و عايشة بينكم و بتغافلكم

لقنونا زمان في درس .. الفرقة ضعف و اللمة قوة

لقنونا و لقنونا .. بس ياريتهم علمونا العلم نور و الجهل ضلمة

العلم نور و الجهل ضلمة .. الدنيا ضلمة .. الدنيا ضلمة ..

مش شايفة حاجه .. أيدوا النور .. أيدوا النور ..

يا اما العلم عز و الجهل ساد .. و العيشة صبحت سكر و رز و العلة سارحة في العباد

أيدوا النور .. الدنيا ضلمة

أيدوا النور .. الدنيا ضلمة

خلصوا الولاد من البلاد

ماتوا الولاد .. راحوا الولاد

عريت راسي و شجيت هدومي و في التراب مرمغتوني

بالأسود كفنوني .. زهرة ولادي بيندهوني

فايتلكم العار يا عرة العيال .. ولا هذكركم ولا تذكروني

ولا هذكركم ولا تذكروني ..

ـــــــــــــــــــــــــــــ

تحياتي/ رانيا حمدي

13/2/2012

2:00 صباحاً

هناك تعليق واحد:

  1. ثقافة الهزيمة .. الناس اللى فوق و الناس اللى تحت

    و نشرت جريدة المصرى اليوم فى 17 فبراير 2012 فى برنامج «محطة مصر» للإعلامى معتز مطر على قناة «مودرن حرية» وجه النائب أبوالعز الحريرى اتهاماً لأحد كبار أعضاء المجلس العسكرى بالتورط فى تهريب 4 مليارات دولار للخارج، وقال إن إحدى الشخصيات تقدمت ببلاغ رسمى عن وجود 15 مليار دولار «أموالاً قذرة» فى البنك المركزى، وقدمته لعدة جهات من بينها المخابرات الحربية التى أخبرته بأنه تمت إحالة البلاغ لأحد كبار أعضاء المجلس، وبعد عدة أيام فوجئت بخروج 4 مليارات دولار من هذا المبلغ خارج مصر،

    وأضاف «الحريرى» أنه يتقدم باستجواب للمشير حسين طنطاوى حول هذا الموضوع، إلى جانب استجواب آخر حول المصرف العربى الذى وصفه بـ«المصرف الملعون»، لأنه «مغسلة للأموال القذرة» فى مصر، ويتربح منه المسؤولون منذ عام 1974، ولا توجد رقابة عليه، وتتعمد وحدة مكافحة غسل الأموال بالبنك المركزى تجاهله تماماً ...باقى المقال فى الرابط التالى

    www.ouregypt.us

    ردحذف